തവള

സജദിൽ മുജീബ്

2014 നവംബര്‍

തവള

സുവോളജി ലാബിലെ
ഡിസക്ഷന്‍ ടേബിളില്‍
നിന്റെ കത്തിക്കു മുമ്പില്‍
വാരിയെല്ലുകള്‍ തുറന്ന്
ഞാന്‍..

മരിച്ചെന്ന് നീ കരുതി
പക്ഷേ
ഹൃദയം മിടിക്കുന്നുണ്ടായിരുന്നു..

കൈകാലുകള്‍
സൂചിയടിച്ച് ഉറപ്പിച്ച്
എന്റെയുള്ളില്‍
വാര്‍ന്ന രക്തം
കഴുകിക്കളഞ്ഞു.

പിന്നെ
ഹൃദയവും
ശ്വാസകോശവും
മുറിച്ചു മാറ്റി
വേസ്റ്റ് ബോക്‌സിലിട്ടു..

അതൊന്നും ആവശ്യമില്ലത്രേ..
ദഹനവ്യവസ്ഥ
പഠിക്കാന്‍ ഹൃദയമെന്തിന് ?

അന്നനാളവും ആമാശയവും
ചെറു-വന്‍കുടലുകളും
മാല പോലെ പുറത്തിട്ട്
അടയാളപ്പെടുത്തി
നീ ലാബ് വിടുമ്പോഴേക്കും
ഞാന്‍ മരിച്ചിരുന്നു..

സജദില്‍ മുജീബ്

ഉന്നമനം

കൊക്കിന് വെച്ചത്
കുറേയേറെ തവണ
കുളക്കോഴിക്ക് കൊണ്ടു.
പിന്നെപ്പിന്നെ
കൊക്കിനും കുളക്കോഴിക്കുമപ്പുറം
കുരുവികള്‍ക്ക്
കൊണ്ടുകൊണ്ടേയിരുന്നു...
വെടികൊണ്ടതൊക്കെയും
ഉന്നമെന്ന് കാണിച്ച്
ഇന്നലെയാണ്
പുതിയ ഉത്തരവിറങ്ങിയത്
ഉന്നമാകാന്‍
താല്‍പര്യമുള്ളവര്‍ക്കായി
അപേക്ഷ വിളിച്ചും കഴിഞ്ഞു.
ഇനി
ഞാനോ... നീയോ?

ശിവപ്രസാദ് പാലോട്

വ്യഥ

ഭൂമിയിലേക്കുതിര്‍ന്നു വീഴുന്ന
ഓരോ മഴത്തുള്ളിയും
ആകാശത്തിന്റെ
വേദനയാണ്.
കൊടുങ്കാറ്റ്
ശാന്തതയുടെ ധ്യാനമാണ്.
ചുവടുവെപ്പുകളില്ലെങ്കില്‍
ചുവടു പിഴക്കലുകളുമില്ല.

വേദന ഒരുപാട് കുടിച്ചിട്ടുണ്ട് നീ
ഹൃദയം ഛര്‍ദ്ദിക്കുമെന്ന് കയ്പ്പുകൊണ്ട്
തോന്നിയിട്ടുണ്ട്, അല്ലേ...?
ഒരു മുറിവും ഉണങ്ങുന്നില്ല,
ഒരു മരുന്നില്ലാതെ.
ഞാന്‍ കണ്ടുവെച്ചിട്ടുണ്ട്
നിനക്കുവേണ്ടി
ആ ദിവ്യൗഷധം
പക്ഷേ ലബോറട്ടറിയില്‍
നിന്നും
മരുന്നുഷാപ്പുകളിലെത്തുന്നതിന് മുമ്പ്
മരിച്ചുപോയ ഒരു
ഭിഷഗ്വരനാണ് ഞാന്‍.

ഷംസീര്‍ എ.പി

ചിരിയുടെ തേങ്ങല്‍

ഒരിടത്ത്
ഒരു
ചിരിയുണ്ടായിരുന്നു.
ആരോ ഒരു കോണില്‍
ഒളിപ്പിച്ചുവെച്ചതായിരുന്നു
ആ ചിരിയെ.
തനിക്കു പറ്റിയ
ചുണ്ടുകളന്വേഷിച്ച്
ചിരി
ഒരുപാട്
മുഖങ്ങള്‍
മറികടന്നു.
പക്ഷേ,
എല്ലാവരും
അവരുടെ
ചുണ്ടുകള്‍
ദുഃഖത്തിനു
വിട്ടുകൊടുത്തിരുന്നു.
പിന്നെയും
അവന്‍
യാത്ര നടത്തി.
ഒടുവില്‍
അവന്‍
ഒരു രാഷ്ട്രീയക്കാരന്റെ
ചുണ്ടില്‍
സ്ഥാനം
പിടിച്ചു.
ഒന്നു
പൊട്ടിച്ചിരിക്കാനൊരുങ്ങും
മുമ്പ്
പിറ്റേന്നെല്ലാവരും
കൂടി
അവനൊരു
പേരു നല്‍കി,
പരിഹാസചിരിയെന്ന്!

നഹ്ദ മജീദ്

തവള

Follow Us

Other Articles

Manager

Circulation

Editorial

Advertisement

Subscription

Quick Links