മനോഹരമായ കൈപ്പടയില്‍ വിശുദ്ധ ഖുര്‍ആന്‍ മുഴുവന്‍ പകര്‍ത്തിയെഴുതി ചരിത്രം രചിച്ചിരിക്കുകയാണ് കോഴിക്കോട് ജില്ലയിലെ ആരാമ്പ്രം സ്വദേശിനി ആഇശ ഫാദിന്‍. ഒന്നര വര്‍ഷം കൊണ്ടാണ് ഈ മിടുക്കി 620 പേജുള്ള ഖുര്‍ആന്‍ പതിപ്പ് തയാറാക്കിയിട്ടുള്ളത്. മടവൂര്‍ ചക്കാലക്കല്‍ ഹയര്‍ സെക്കന്ററി സ്‌കൂള്‍ പത്താം ക്ലാസ് വിദ്യാര്‍ഥിനിയാണ് ആഇശ ഫാദിന്‍.
പ്രസ്സില്‍നിന്ന് അച്ചടിച്ച് പുറത്തിറക്കുന്ന ഖുര്‍ആനിന്റെ അതേ കെട്ടിലും മട്ടിലുമാണ് ആഇശ ഫാദിന്‍ ഖുര്‍ആന്‍ കൈയെഴുത്ത് പ്രതി തയാറാക്കിയിട്ടുള്ളത്. കവര്‍ ഡിസൈന്‍ ചെയ്തിട്ടുള്ളതും ഈ മിടുക്കി തന്നെ. സൂക്ഷ്മ പരിശോധന നടത്തി തെറ്റില്ലെന്ന് ഉറപ്പ് വരുത്തിയ ശേഷമാണ് പ്രിന്റിംഗ് പ്രസ്സില്‍ കൊടുത്ത് ഖുര്‍ആന്‍ പ്രതി ഭംഗിയായി ബൈന്റ് ചെയ്യിച്ചിട്ടുള്ളത്. പരിശോധനക്ക് മാതാപിതാക്കള്‍ക്ക് പുറമെ പ്രദേശത്തെ മതാധ്യാപകരും സഹായിച്ചതായി ആഇശ പറഞ്ഞു.
തുടക്കത്തില്‍ ഖുര്‍ആന്‍ എഴുത്ത്  വെല്ലുവിളിയായി തോന്നിയെങ്കിലും ക്രമേണ എളുപ്പമായി. അറബി ഭാഷയിലെ പരിചയക്കുറവായിരുന്നു അതിന് കാരണം. സ്‌കൂള്‍ പഠനം കഴിഞ്ഞ് മിച്ചം കിട്ടിയ സമയത്താണ് എഴുതിത്തുടങ്ങിയത്. ഉമ്മ സ്റ്റഫിനയുടെ പ്രോത്സാഹനവും പ്രവാസിയായ പിതാവ് യാസര്‍ അറഫാത്തിന്റെ പിന്തുണയും ആഇശ ഫാദിന്റെ ആഗ്രഹ സാഫല്യത്തിന് തുണയായി. കുട്ടിക്കാലം മുതലേ പുസ്തകങ്ങളെ പ്രണയിക്കുന്ന ആഇശ അറബിക് കാലിഗ്രാഫിയിലും ഒരു കൈ നോക്കാന്‍ ആഗ്രഹിക്കുന്നു. ഔപചാരികമായി കാലിഗ്രാഫി പഠിച്ചിട്ടില്ലെങ്കിലും എഴുത്തിനോടും വരയോടുമുള്ള പ്രേമം കാലിഗ്രാഫി സ്വയം പരിശീലിക്കുന്നതിന് പ്രേരകമായി.
അറബി കാലിഗ്രഫിയോടുള്ള താല്‍പര്യമാണ് ഖുര്‍ആന്‍ എഴുത്തിലേക്ക് കൊണ്ടെത്തിച്ചത്. എ4 പേപ്പറിലാണ് എഴുതിത്തുടങ്ങിയത്. എഴുത്തിന്റെ ഭംഗി കണ്ട് മേത്തരം പേപ്പറില്‍ കൂടുതല്‍ വടിവോടെ എഴുതാനും പുസ്തക രൂപത്തില്‍ ബൈന്റ് ചെയ്യാനും ഉമ്മ നിര്‍ദേശിക്കുകയായിരുന്നുവെന്ന് ആഇശ ഫാദിന്‍ പറഞ്ഞു. ഒഴിവ് വേളകള്‍ ഒട്ടും പാഴാക്കാതെ ഓരോ വരിയും സമയമെടുത്ത് തെറ്റാതെ എഴുതി 620 പേജ് മുഴുമിപ്പിച്ചു.
ചക്കാലക്കല്‍ ഇര്‍ശാദുല്‍ അനാം മദ്‌റസയില്‍ വെച്ച് ആഇശയുടെ വല്യുപ്പ പി.കെ കുഞ്ഞമ്മദ് അശ്‌റഫ് ദാരിമിക്ക് കൈയെഴുത്ത് പ്രതി കൈമാറിക്കൊണ്ടാണ് ഇതിന്റെ പ്രകാശനം നടന്നത്. 
l