ഞാവല്‍

ഡോ: മുഹമ്മദ് ബിന്‍ അഹ്മദ്‌ / വീട്ടുമുറ്റം No image

കേട്ടാല്‍ ഒരു കാട്ടുമരം. ഫര്‍ണിച്ചറുണ്ടാക്കാനും കുട്ടികള്‍ക്ക് അവധിക്കാലത്ത് കയറി മറിഞ്ഞു പഴം പറിച്ചു തിന്നാനും കഴിയും. ഈ അറിവേ ഞാവല്‍ മരത്തെക്കുറിച്ച് നമുക്കുള്ളൂ. ചില സന്ദര്‍ഭങ്ങളില്‍ പാടത്ത് അടിവളമായും നേന്ത്രവാഴ മുതലായവക്കുള്ള പശിമക്കായും (തോലായും) ഉപയോഗിക്കുന്ന മരം എന്നൊക്കെയുള്ള നാടന്‍ അറിവുകളില്‍ ഒതുക്കി ഞാവലിനെ. എന്നാല്‍ വടക്കെ ഇന്ത്യക്കാര്‍ ഞാവലിനെ ജനകീയ പഴമായിട്ടാണ് കണക്കാക്കുന്നത്. ഉഷ്ണകാലത്താണിത് കായ്ക്കുന്നത്. അതുകൊണ്ടു തന്നെ കുട്ടികളുടെ ഒരു വര്‍ഷത്തേക്കുള്ള വൈറ്റമിന്റെ സംഭരണ കാലമാണ് ഞാവല്‍ സീസണ്‍ എന്നും പറയാം. ഒരു തരത്തിലുള്ള വളപ്രയോഗവും ആവശ്യമില്ലാതെ പന്തലിച്ചു വളരുന്ന വൃക്ഷമാണ് ഞാവല്‍. വളരാന്‍ കൃത്യമായ വളപ്രയോഗമോ കായ്ക്കുമ്പോള്‍ കീടങ്ങളില്‍ നിന്നും രക്ഷ നേടാനായി കീടനാശിനി പ്രയോഗമോ ഒന്നും ആവശ്യമില്ലാതെ വളരുന്നു എന്നതാണിതിന്റെ പ്രത്യേകത.
ഇതിന്റെ ഇലകളും, തോലും, കുരുവും ഔഷധത്തിനായും തടി വീട്ടുപകരണങ്ങളുണ്ടാക്കാനും ഉപയോഗിച്ചു വരുന്നു. പാകമാകുമ്പോള്‍ കുരുവിനെ പൊതിഞ്ഞുള്ള മാംസള ഭാഗം ക്രമേണ കറുത്തു വരുന്നു. നന്നായി കറുത്തു വന്നാല്‍ മധുരമായെന്നും പഴം പാകമായെന്നും മനസ്സിലാക്കാം. പഴം ഈമ്പിത്തിന്നതിന് ശേഷം വലിച്ചെറിയുന്ന കുരു ഒന്നാംതരം പ്രമേഹ ഔഷധമാണെന്നും മനസ്സിലാക്കണം.
മിര്‍ട്ടേസി കുടുംബത്തില്‍ ജനിച്ച ഇതിന്റെ ശാസ്ത്രനാമം സിസിജിയം കമിനി സ്തീല്‍സ് എന്നാണ്. നീര്‍ക്കെട്ടുള്ള ചതുപ്പു നിലങ്ങളിലും മരുഭൂമിയിലും ഇത് വളരുകയില്ല. ഈര്‍പ്പമുള്ള കുന്നിന്‍ ചെരുവുകള്‍, വെള്ള വാര്‍ച്ചയുള്ള വരമ്പുകള്‍, മണ്ണോട്ടമുള്ള പ്രദേശങ്ങള്‍ എന്നിവിടങ്ങളില്‍ സമൃദ്ധിയായി വളരുന്നു.
കൂടുതല്‍ ഉയരത്തില്‍ വളരുന്നതുകൊണ്ടും ഉറപ്പുള്ള തടിയായതുകൊണ്ടും ഇതിന്റെ തടി മരപ്പണിക്കായി ഉപയോഗിച്ച് വരുന്നു. മരം ഈര്‍ന്നതിന് ശേഷം വെള്ളത്തില്‍ ദിവസങ്ങളോളം മുക്കിയിടണം. എന്നാലേ മരത്തിന് ഈടും ഉറപ്പുമുണ്ടാകൂ, ഫലത്തിനുള്ളില്‍ ഒരു വിത്തേ ഉണ്ടാകൂ, കാര്‍ബോ ഹൈഡ്രേറ്റ്, വിറ്റമിന്‍ എ, ബി, സി പ്രോട്ടീന്‍, ഗൈനിക്കമ്ലം എന്നിവയും അടങ്ങിയതുകൊണ്ടാണ് സമ്പൂര്‍ണ ആരോഗ്യ വര്‍ധനമായ ഒരു പഴമാണിതെന്നു പറയപ്പെടുന്നത്.
ഞാവല്‍ പഴം പോലെ ഞാവല്‍ തോലും ഒന്നാം തരം പ്രമേഹ ഔഷധമാണ്. 100 ഗ്രാം ഞാവല്‍ തോല്‍ നുറുക്കി കഴുകി വൃത്തിയാക്കി ചതച്ച് ഒരു ലിറ്റര്‍ വെള്ളത്തില്‍ കഷായം വെച്ച് 150 മില്ലിയാക്കി അരിച്ചെടുത്ത് 50മില്ലീ ലിറ്റര്‍ വീതം മൂന്ന് നേരം കഴിച്ചാല്‍ പ്രമേഹത്തിന് ശമനം കിട്ടും. ഞാവല്‍ തോലും മുത്തങ്ങാ മൊരികളഞ്ഞതും ചേര്‍ത്തുണ്ടാക്കുന്ന കഷായവും ഞാവല്‍തൊലി, ചുക്ക് കൂട്ടിവെച്ച കഷായവും അതിസാരം, രക്താതിസാരം, പുളിച്ചു തികട്ടല്‍, ഛര്‍ദ്ദി, അരുചി മുതലായവക്കും ഫലവത്താണ്,
ഞാവല്‍ക്കുരു കഴുകി വൃത്തിയാക്കി ഉണക്കിപ്പൊടിച്ച് താനെ കഴിക്കുന്നതും തേനില്‍ ചേര്‍ത്ത് കഴിക്കുന്നതും ഞാവല്‍ക്കുരു പൊടിയും മഞ്ഞള്‍പൊടിയും ചേര്‍ത്ത് കഴിക്കുന്നതും ഞാവല്‍ക്കുരു പൊടിയും രാമച്ചപ്പൊടിയും ചേര്‍ത്ത് കഴിക്കുന്നതും പ്രമേഹഹഔഷദമാണ്.
ശരീരം പൊള്ളിയാല്‍ ഞാവല്‍ ഇലനീരില്‍ അതു തന്നെ അരച്ചു ചേര്‍ത്ത് കാച്ചിയ വെളിച്ചെണ്ണയോ കടുകെണ്ണയോ ചേര്‍ത്ത് പൊള്ളിയ ഭാഗങ്ങളില്‍ പുരട്ടുന്നതും നല്ലതാണ്. ഞാവല്‍ ഇലനീരില്‍ കടുകെണ്ണ ചേര്‍ത്തുണ്ടാക്കുന്ന എണ്ണ വ്രണങ്ങള്‍ക്ക് ഗുണം ചെയ്യുന്നതാണ്.

Manager

Silver hills, Calicut-12
Phone: 0495 2730073
managerprabodhanamclt@gmail.com


Circulation

Silver Hills, Calicut-12
Phone: 0495 2731486
aramamvellimadukunnu@gmail.com

Editorial

Silver Hills, Calicut-12
Phone: 0495 2730075
aramammonthly@gmail.com


Advertisement

Phone: +91 9947532190
advtaramam@gmail.com

Editor

K.K Fathima Suhara



Sub Editors

Fousiya Shams
Fathima Bishara

Subscription

  • For 1 Year : 300
  • For 1 Copy : 25
© Copyright Aramam monthly , All Rights Reserved Powered by:
Top