സത്യവിശ്വാസികള് എവിടെയൊക്കെ ജീവിക്കുന്നുവോ അവിടെയൊക്കെയും വിപുലതയില് തന്നെ പുണ്യ പ്രവാചകനും സാന്നിധ്യമറിയിക്കും. ജീവിതത്തില് മാത്രമല്ല അവരുടെ ഏട്ടിലും പാട്ടിലും മറ്റു സര്ഗാത്മക രചനകളിലും തിരുജീവിതം തുളുമ്പി നില്ക്കും. വിശ്വാസികള്ക്ക് അവരെക്കാള് പ്രിയവും ആദരങ്ങളുമാണ് പ്രവാചകനോട്. അതുകൊണ്ടാണ് പ്രവാചക സാന്നിധ്യം അവരുടെ ജീവിത പരിസരത്തില് ഇങ്ങനെ തുടിച്ചു നില്ക്കുന്നത്. മലയാളത്തില് പുണ്യറസൂല് ഇത്രയും ശേഷിയില് നമ്മുടെ സാംസ്കാരിക ജീവിതത്തെ നിര്ണയിക്കുന്നതും അതുകൊണ്ടാണ്. സ്വാഭാവികമായും ഏതു മനുഷ്യരിലും വെളിപ്പെടുന്നതാണ് അവരുടെ അനുഭൂതികളുടെയും സൗന്ദര്യാന്വേഷണത്തിന്റെയും ഒരു സമാന്തര ലോകം. സ്വാഭാവികമായും ഇതിലൊക്കെയും റസൂല് കടന്നു വരും. പ്രവാചകജീവിതം ആവിഷ്കരിക്കുന്ന നിരവധി പാട്ടുകളും കഥകളും കവിതകളും മലയാളത്തിലുണ്ട്. അറബിയിലും അറബി മലയാളത്തിലും മാനക മലയാളത്തില് തന്നെയും തിരുജീവിതത്തെ വിശദീകരിക്കുന്ന നിരവധിയായ പുസ്തകങ്ങള് പുറത്തുവന്നിട്ടുണ്ട്.
നമ്മുടെ പൊതുഅറിവിലുള്ള പ്രവാചക കവിതകള് വള്ളത്തോളും ജി. ശങ്കരക്കുറുപ്പും പി. കുഞ്ഞിരാമന് നായരും തുടങ്ങി ആധുനിക കവികളില് ചിലരുടെ രചനകള് മാത്രമാണ്. എന്നാല്, 1920-1940-കളില് ഇറങ്ങിയിരുന്ന പ്രഖ്യാതമായ പ്രസിദ്ധീകരണങ്ങളില് നിരവധി മുസ്ലിമേതര കവികള് വിശ്രുതങ്ങളായ കവിതകള്കൊണ്ട് പ്രവാചക ജീവിതത്തെ പുരസ്കരിച്ചിട്ടുണ്ട്. ഇശായത്ത്, മാപ്പിള റിവ്യൂ, യുവകേസരി, അന്സാരി തുടങ്ങിയ മാസികകളിലാണ് ഇത്തരം കവിതകള് നിരന്തരം വന്നുകൊണ്ടിരുന്നത്. ഇ.കെ ശാരദാദേവി, എന്.സി നായര്, പന്തളം രാഘവപ്പണിക്കര്, പി.എന്.ജി നായര്, കെ. ചക്രവാണി വാര്യര്, വാസുദേവ പൈ, വൈ. നാരായണയ്യര് സൂര്യനെഴുത്തച്ഛന് തുടങ്ങിയ ഈ കവിനിര നീണ്ടു നീണ്ടു പോയി പ്രൊഫ. തായാട്ട് ശങ്കരനില് എത്തിനില്ക്കുന്നു. കേരളത്തിലെ മുസ്ലിം സാംസ്കാരിക പുരാരേഖാ അന്വേഷകനും സൂക്ഷിപ്പുകാരനുമായ അബ്ദുറഹിമാന് മങ്ങാട് തന്റെ അര നൂറ്റാണ്ട് കാലത്തെ നിഷ്കൃഷ്ടമായ അന്വേഷണത്തിനൊടുവില് ഈ കവിതകളൊക്കെയും ശേഖരിച്ചു വെച്ചിട്ടുണ്ട്. ഇതില്നിന്നും വളരെ മൗലികതയുള്ള കവിതകള് തെരഞ്ഞെടുത്ത് ഇന്സ്റ്റിറ്റ്യൂട്ട് ഓഫ് ഒബ്ജക്റ്റീവ് സ്റ്റഡീസ് കോഴിക്കോട് ' മരുഭൂ വസന്തം'' എന്ന പേരില് സമാഹാരമാക്കി പ്രസിദ്ധീകരിച്ചിരിക്കുകയാണ്. അബ്ദുറഹിമാന് മങ്ങാട് തന്നെയാണ് ഇതിന്റെ എഡിറ്റര്.
ഇതിലൊന്നാണ് കവി എം.സി നാരായണന് അന്നനടയിലും കേകയിലുമായെഴുതിയ ദീര്ഘ കവിത.
''പരമപാവനന് നബി കുമാരകന്,
പരിതുഷ്ടി സര്വ്വ ജനത്തിനും ചേര്ത്തും.
ധരണിവാസികള്ക്കിടയിലന്പൊടു
കരുണയെ സദാ വിതരണം ചെയ്തും.'
' [പ്രവാചകോത്തമന് അഥവാ മുഹമ്മദു നബി ].
മറ്റൊരു മനോഹര കവിതയാണ് പന്തളം ആര്.പി രാഘവപ്പണിക്കരുടേത്. ''സുപ്രയത്നം സമാധാന
മൈകമത്യം സഹിഷ്ണുത
ഇസ്ലാമെന്ന പദത്തിന്റെ ശരിയാം പൊരുളേവമാം''. ഇസ്ലാമിക സൂക്തികള് ബ്രിട്ടീഷ് ഇന്ത്യയിലെ പ്രമുഖ വിദ്യാഭ്യാസ പ്രവര്ത്തകനായിരുന്ന സയ്യിദ് അബ്ദുല് ഗഫൂര് ഷാ . അദ്ദേഹത്തിന്റെ വിശ്രുതമാര്ന്ന പ്രവാചക കവിതയാണ് '' നബി ചരിതം മണിപ്രവാളം''. ഇത് 1930-ല് മാസ് ബുക് ഹൗസ് ഒരിക്കല് മാത്രം പ്രസാധിപ്പിച്ചതാണ്. നബിജീവിതം വളരെ വിസ്താര ഭംഗിയില് പാടിപ്പറയുന്ന ഈ കവിത ഒരു നൂറ്റാണ്ടോളമായി വായനക്കാര്ക്ക് ലഭ്യമായിരുന്നില്ല. ആ കവിത ഈ സമാഹാരത്തിലൂടെ വീണ്ടും വായനക്കാരിലേക്കെത്തുന്നു. മനോഹരമാണീ കവിതയുടെ ഭാഷയും അന്വയ ഭംഗിയും.
പ്രൊഫ. തായാട്ട് ശങ്കരനെ നാം അറിയുന്നത് കവിയായല്ല. പക്ഷേ, ഇമ്പമോലുന്നൊരു കവിത ശുദ്ധമലയാളത്തില് പ്രവാചകനെ പ്രതി അദ്ദേഹം എഴുതിയിട്ടുണ്ട്. അതാണ് 'നബി'.
''കൂപ്പുകൈമൊട്ടിനാലാര്ച്ചനം ചെയ്തതാ
ണിപ്പൊഴും ലോകമന്നാമവര്ണങ്ങളെ
അന്ധവിശ്വാസമാമന്ധകാരത്തിലെ
പൂന്തിങ്കളായിപ്പിറന്നു നീ പാരിതില് ''.
[മാപ്പിള റിവ്യൂ 1944 ഒക്ടോബര്]. മഹാകവികളായ വള്ളത്തോള്, പി. കുഞ്ഞിരാമന് നായര്, ജി. ശങ്കരക്കുറുപ്പ് എന്നിവര് പ്രവാചക ജീവിതത്തിലെ മഹാ മുഹൂര്ത്തങ്ങളെ കവിതകളില് ആവിഷ്കരിച്ചിട്ടുണ്ട്. അതും സമാഹാരത്തില് എഡിറ്റര് എടുത്തു ചേര്ത്തിട്ടുണ്ട്. അതുപോലെ വര്ത്തമാനകാലത്ത് ശ്രദ്ധേയരായ സച്ചിദാനന്ദന്, കല്പറ്റ നാരായണന്, ആലംങ്കോട് ലീലാ കൃഷ്ണന് പി.കെ ഗോപി തുടങ്ങിയവരുടെ മനോഹരങ്ങളായ പ്രവാചക കവിതകളുണ്ട്. അതും എഡിറ്റര് സമാഹാരത്തില് എടുത്ത് ചേര്ത്തിട്ടുണ്ട്.
മുന്നൂറോളം താളുകളിലേക്ക് വികസിക്കുന്ന ഈ സമാഹാരത്തില് അറുപതിലേറെ കവിതകളുണ്ട്. മാനകമലയാളം സാര്വത്രികമായ കാലംതൊട്ട് ഇന്നോളം മലയാളത്തിലിറങ്ങിയ പ്രവാചക കവിതകളില് സവിശേഷമായതൊക്കെയും സംക്ഷേപിക്കപ്പെട്ടതാണീ സമാഹാരം. പുസ്തകത്തിലൂടെ സഞ്ചരിക്കുമ്പോള് നാം സത്യമായും അതിശയിച്ചു പോവും. കാരണം, കേരളീയ സാംസ്കാരിക ലോകം ഇന്നത്തെക്കാള് എത്രയോ ഉദ്ഗ്രഥിതവും സ്വതന്ത്രവുമായിരുന്നു അക്കാലത്തെന്നു തോന്നും. ഉദാരമായ കൊടുക്കല്-വാങ്ങലുകള് നിലനിന്നൊരു കാലം. അതുകൊണ്ടാണ് മുസ്ലിമേതര സമൂഹത്തിന്റെ മുന്കൈയില് ഇത്രയേറെ കവിതകള് പ്രവാചകനെപ്പറ്റി മലയാളത്തില് സാധ്യമായത്. ഡോ. ഉമര് തറമേലാണ് സമാഹാരത്തിന് അവതാരിക എഴുതിയിട്ടുള്ളത്. ഡോ. ബാവ പാലുകുന്നിന്റെ പഠനം പുസ്തകത്തെ കൂടുതല് ആധികാരികമാക്കുന്നുണ്ട്.
l